મુંબઈ (બોરીવલી): બોરીવલી સ્થિત વ્રજ મુરલી નિકેતન હવેલીમાં આગામી ૧૩ એપ્રિલના રોજ ભક્તિનો દ્વિગુણિત આનંદ છવાશે. એક તરફ પુષ્ટિમાર્ગના પ્રણેતા શ્રીમદ વલ્લભાચાર્ય મહાપ્રભુજીનો ૫૪૯મો પ્રાગટ્ય મહોત્સવ ઉજવાશે, તો બીજી તરફ વૈષ્ણવોના વહાલા માર્ગદર્શક પરમ પૂજ્ય ગોસ્વામી શ્રી ૧૦૮ શ્રી વ્રજપ્રિયજી મહારાજશ્રી (છોટે બાવાશ્રી) ના ૭૦મા જન્મોત્સવની ભવ્ય ઉજવણી કરવામાં આવશે.આ પાવન અવસરે નંદોત્સવ, વધાઈ કીર્તન અને મહાપ્રસાદના વિશેષ આયોજન દ્વારા આખું વાતાવરણ કૃષ્ણમય બની જશે.
ભક્તિમય કાર્યક્રમોની હારમાળા સાંજે ૫:૦૦ વાગ્યે શરૂ થનારા આ મહોત્સવમાં નંદોત્સવની ધામધૂમથી ઉજવણી કરવામાં આવશે. ઠાકોરજીના લાડ લડાવવા માટે મનમોહક વધાઈ કીર્તનની રમઝટ બોલાવવામાં આવશે. આ પ્રસંગે વૈષ્ણવો જેજેશ્રીના ચરણસ્પર્શ કરી આશીર્વાદ પ્રાપ્ત કરશે અને ત્યારબાદ મહાપ્રસાદનું પણ સુંદર આયોજન કરવામાં આવ્યું છે.
ઐતિહાસિક અને આધ્યાત્મિક મહત્વ ઉલ્લેખનીય છે કે, વિક્રમ સંવત ૧૫૩૫માં ચંપારણ્યની પવિત્ર ધરતી પર પ્રગટ થયેલા શ્રી મહાપ્રભુજીએ જગતને ‘પુષ્ટિમાર્ગ’ની ભેટ આપી હતી. ૫૪૯ વર્ષ બાદ પણ તેમનો આ સેવા-માર્ગ કરોડો જીવોને શ્રીનાથજીના ચરણોમાં જોડે છે.
ઉત્સવની વિગત:
- તારીખ: ૧૩ એપ્રિલ (સોમવાર)
- સમય: સાંજે ૫:૦૦ વાગ્યે થી…
- સ્થળ: શ્રી વ્રજ નિધિ, બોરીવલી (વેસ્ટ), મુંબઈ.
કાર્યક્રમની રૂપરેખા:
- નંદોત્સવ: આનંદ અને ઉલ્લાસ સાથે લાડ લડાવવાનો લ્હાવો.
- વધાઈ કીર્તન: મનમોહક કીર્તનની રમઝટ.
- ચરણસ્પર્શ: જેજેશ્રીના આશીર્વાદ અને ચરણસ્પર્શનો લાભ.
- મહાપ્રસાદ: ભક્તિભાવ પૂર્વક પ્રસાદની વ્યવસ્થા.
જગદગુરુ શ્રી વલ્લભાચાર્યજી મહાપ્રભુજીનો પ્રાગટ્ય ઉત્સવ: પુષ્ટિમાર્ગના પ્રણેતા અને સાક્ષાત્ અગ્નિ સ્વરૂપ પ્રભુનું ધરતી પર અવતરણ.
આપણા વહાલા શ્રી વ્રજપ્રિયજી મહારાજ (છોટે બાવાશ્રી)નો 70th જન્મદિવસ: વૈષ્ણવોના હૃદય સમ્રાટ અને માર્ગદર્શક જેજેશ્રીનો જન્મોત્સવ.
તમામ વૈષ્ણવોને આ દિવ્ય સત્સંગ અને ઉત્સવનો લાભ લેવા ભાવભીનું આમંત્રણ પાઠવવામાં આવ્યું છે.
સેવા આપવા ઈચ્છુક વૈષ્ણવો માટે ખાસ નોંધ: જે કોઈ વૈષ્ણવ ભાઈ-બહેનો આ ઉત્સવમાં સેવા આપવા ઈચ્છતા હોય, તેમણે મુંઝવવાની જરૂર નથી. આપ આપના ID Cards હવેલીના પરિસરમાંથી શ્રીનાથ માલવિયા (Shreenath Malviya) પાસેથી મેળવી શકો છો.
